| | 由98年拾o下拾o下入市至今,唔經唔覺之間,就過o左七年.七年前,羅文仲未死,呀梅姐仲係度,董建華仲以為做特首會好好玩,好過癮,而梁錦松,亦從未想過自己將來會有朝一日,買車會買到好很大鑊........
而我,亦從未想過自己有朝一日,炒股炒到入哂迷,仲炒埋輪,期指,仲整多層樓.................如果下一個金融風暴的來臨,我,會唔會輸到要燒炭呢??我,駛唔駛買定1171,方便自己去搵炭呢?.........
在之前,報紙有段新聞,話有位資深股民,炒輪輸o左9百幾萬!資深都要輸9百幾萬??!大佬,仲要發生在大跌600點之前!呢位老友,佢到底炒乜輪呀??!
再遠dd,亦有位資深期權玩家,自殺告別人世.雖然我唔知真相係乜.但,我諗諗o下,我會唔會,我亦有一日.....................
我再諗諗o下,襯我仲生勾勾,泥總結一下,自己呢幾年炒股o既炒後感,寫出泥.等大家泥笑o下我o既無知,都係好事o架,對嗎??
~~~~~~~~~~98年第一注訓身買股後，點解有錢贏的重新檢討~~~~~~~~~~~
1)要有入市本錢。
想炒股，必先有本，才有得炒。自己冇錢，搵條毛去炒咩？！賭本o既來源，各師各法。可以係儲番泥，借番泥，呃番泥，搶番泥...........
所以未有本o既後生仔，要好好努力，儲多d本，等股災時，訓身入市！天下第一營生也！呢個世界，永遠耐唔耐，都一定有股災的。
衹要你手上唔係重倉，衹要你有辦法籌到銀兩，衹要你手上唔渣成身C輪，好倉期指....股災有乜好怕？每次股災，都係搵大茶飯食的好機會。
而我o個次入市o既資金來源，就係趁股災，去銀行押o左層舊居，用o個d錢去炒股。
在呢度，就牽涉到，房地產是否值得投資的問題？我覺得，如一個小家庭，自己要租私樓住，要付同供樓差唔多o既租金，呢種情況，o係最適宜供樓的。呢種情況，俾銀行食息，係俾得最值得的。供樓係隨時15年以上的事，衹要唔在一窩蜂的情況下去排隊搶樓，多數都唔會買錯的。
但如自己已有平樓住，又或者自己已有一層樓，再供多一層樓，性質就完全唔同喇。問題並唔在層樓平或貴，抵或唔抵；問題是自己在借咁銀行錢，去擁有一樣o野，而呢d錢，係要俾息o架嘛！
你試o下去押 d o野，借8成孖展去炒金，炒匯，炒股，風險又會有幾低呢？而且，供新樓仲有P-2~2.5息，而押其它，你估銀行又同你點計息鴉o拿！
我當時押層樓，去借錢炒股，就係要俾P+2息o架！
如果各位後生仔網友，你又唔駛交貴租，你又有一份工做，你又想將來，等股災來臨，玩炒賣游戲。咁，就一定要先做好儲錢計劃喇！冇錢，就冇得入場，冇得入場，就有機會都唔關你事，對嗎？
炒股先要搵本，儲本。這是第一步！
~~~~~~~~~~98年第一注訓身買股後，點解有錢贏的重新檢討~~~~~~~~~~~
2)運氣之重要
第二個重點好簡單，就係運氣！
我最初炒股，乜實都唔識，剩係知到時到候，就會有錢贏。乜o野圖表，止蝕，止賺，唔好溝淡，P/E，息率，公司核心業務價值研究.......完全都烏啄啄！但，我一樣有錢贏！而且，炒股利潤，仲增長得好快！
到而家，識得  呃喇，自己仲耐唔耐，扮o下專家，認屎認屁吹水。而有時候，亦有d無知網友，問我對股隻，大市o既睇法.......反而，我自己o既投資或投機組合,仲唔識贏錢...................就算有得贏，亦衹係雞碎咁多...................
人，真係有運o架，如果覺得自己黑，就一定要信運，信命！賭少d，賭細d，唔好唔信邪！黑時，就要抖抖，人一世，流流長。到好運時，再同佢博過。
我o係買o左1171，但我目的係想去贏佢錢，唔係留番俾自己用o架嘛。 
~~~~~~~~~~98年第一注訓身買股後，點解有錢贏的重新檢討~~~~~~~~~~~
3)所謂技巧篇之一
炒股其實得三樣o野
a)買入價
b)賣出價
c)坐貨價
而c，坐貨價，係冇意義價(除非自己利用d貨做咁孖展)。坐貨價，升同跌，都係紙上數字游戲。要套現時，至係可以真正計數，呢次交易，係輸或贏？
所有五花八門，千奇八怪o既測市方法。都係想搵到低買高賣o既贏錢方法。
唉，大家都想低買高賣。咁，邊個肯做接貨o個個呀！！！
跟住，我會講o下我對某d買賣股票方法o既睇法。
~~~~~~~~~~98年第一注訓身買股後，點解有錢贏的重新檢討~~~~~~~~~~~
3)所謂技巧篇之二
炒股炒到而家，令我贏大錢o既股票。
a)藍籌系列1,13,16,941
b)國企系列386,857,1071
而呢d股票o既買入價位，都多是在市場情緒最悲觀是，我就分段買入，不設止蝕，逐步吸納。到市場氣氛轉好時。我就好多時財息兼收，逐步沽出，分段獲利。
老實講，我自己睇番我自己呢幾年，我o既食糊技巧，真係好屎！！！如果稍為把握得好d，呢幾年，我最少應贏多兩百萬！不過贏少o左，總好過輸，對嗎？！而且，亦可能因自己唔太貪，說不定在無形中，在我炒股生涯入面，幫我避過一些災禍的。
真正令我贏錢o既股票，都係一d好簡單，又令我敢大注買o既股票。我真係唔敢大注去賭一d中小形公司o既股票。市場上，真係有好多陷阱的。
我諗，呢種贏錢o既方法，算o係所謂o既價值投資法o瓜。當市場氣氛最差時，你敢買入一d優質公司o既股票，中長線持有。呢個就係股票市場，最易贏錢同最簡單贏錢o既方法。如唔識揀公司，就買2800。你敢在恆指9000點時買入，渣到而家，就值14個9毫半喇。
當然，如o個o個都咁玩，經紀就冇得玩了。
呢個係一個最簡單，最多人識，難度最低o既技巧。但，到而家，又有幾多個股場老手，能用到呢套最基本o既o野，去為自己，謀到福利呢？？！
~~~~~~~~~~98年第一注訓身買股後，點解有錢贏的重新檢討~~~~~~~~~~~
3)所謂技巧篇之三
之所謂長期平均買入法
係網上，真係學到好多o野，唔少奇人異仕，都會介紹一d贏錢o既炒股方法。
有d朋友，往往覺得自己是在投資咁，唔係玩緊投機................但，你係咁諗，冇用o個喎！我o地處身真實o既市場，係唔係好似我o地自己一樣咁諗先？？！
有一種投資或投機買賣股票方法，叫做長期平均買入法。亦即係自己唔理o個隻股票係乜位，衹要自己覺得o個隻股票有錢途，就定期+分期，不理乜價去收集呢隻自己心怡o既股票。
理論上，衹要自己揀o岩股票。咁，自己o既投資，就會贏梗！講呢套理論o既高手，當然會講出一d成功o既例子出泥。o拿，如330,5,宏利,857,386呢d公司，我長期收集係幾好呢！
問題係，你而家o個倉，有幾多330,5,宏利,857,386呢d公司o既股票呢？如果有，你又係乜位，開始平均買入呢？
我鍾意用恆指(如圖)來做例子。如呢八年間，我由恆指12000點開始每月吸入一手2800。長期衹買不沽，咁大家計o下，我玩到而家，我o既利潤又有幾多呢？
我玩1071，我都算係佢o既長期收集者。但有d位，我剩係衹沽，不會買的。
所謂長期平均買入法賺得多唔多？重點要睇o下自己，在乜位開始去平均買入！至於升時食唔食糊？就要自己諗自己！
~~~~~~~~~~98年第一注訓身買股後，點解有錢贏的重新檢~~~~~~~~~~~
3)所謂技巧篇之四
之所謂順勢而行投資大法
之前所講o既，係中長線o既玩股必勝竅門。衹要有耐性，同有本金，同肯買入2800，就贏硬o左9成9！
唯一可以輸o既o個1%誘因，o係因為自己太短命，自己在買入平均價1萬點入o既2800後，都未等得切佢升，自己就死鬼o左！咁就神仙都救唔到自己喇。
在呢處，就帶出一樣o野，唔止輪，有時間值；其實自己條命，同樣都有時間值o既問題存在的。
想避開自己條命o既時間值o既封殺，就可以玩o下短炒。而短炒o既玩法，輸贏都好，就應有另一套功夫的(至少我係咁認為)。其中最煞食o既，當然就係順勢而行炒股大法！
順勢而行，幾好聽呀可？！！！升就跟入，跌就即刻走！我揮一揮衣袖，衹帶走幾張金牛，不帶走一片雲彩..................何等的瀟灑美味啊！！！
但，呢種功夫，又點去練呢？？！老實同你講，真係識呢門功夫o既高手，又點會得閒o係呢度，寫咁多廢話，去過料教你呀？？！講得難聽d，你肯交學費，人o地都未必睬你啦！知母？？？！
所以答案，我o地衹有通過一d實例o既圖表+成交，自己去研究，自己去搵。而且，我認為，過去o既實例數據，衹係有參考價值。實戰中，永遠冇話百份百成功的！能把握到8成+做到到交易時有8成勝算(十隻中八隻)，已經o係，足夠為自己搵少少銀兩喇！
而且設記，呢種玩法，一定要設止蝕！絕不能溝淡！！！如果唔係，你沒有好結果呢隻歌，就一定是為你而唱的。信不信由你！！！
跟住，我會舉一d自己短炒o既炒賣實例，有d係輸，有d係贏。俾大家自己去思考o下！
記住，答案，係要自己去思考+自己發掘o既。如由我去話俾你聽，呢個答案，衹係我o既答案，並唔係你自己o既答案！！！
記住，在股海實戰中，問題o既答案，永遠都係冇一定o岩o既炒賣程式，同一個一定o岩o既標準答案模式的！唯一o既俾分標準，就係，當你玩完呢個游戲，炒賣完呢隻股份.........自己到底係輸o左，或係贏o左呢？？？！
出處: http://www.inv168.com/phpBB2/viewtopic.php?t=21995&highlight=%A7%EB%B8%EA+%AC%F6%AB%DF |
